BR LA UNION – Pormal nga ag-convene iti Senado kas impeachment court ita nga aldaw ti Lunes, Mayo 18, 2026 tapno rugyan a denggen iti kaso nga impeachment kontra kenni Vice President Sara Duterte.
Maipalagip a ti Senado iti articles of impeachment ken dagiti dokumento nga impatulod ti Kamara de Representantes idi rabii ti Mayo 13.
Ag-convene ti senado kas impeachment court iti oras alas-3 inton malem, maiyannurot iti Senate Rules of Procedure on Impeachment Trials ken iti mandato ti Konstitusyon.
Sumangsango ni Duterte iti reklamo nga adda pakainaiganna iti maipagarop a biddut a panangusar ti pondo ti publiko, saan a mailawlawag a kinabaknang, ken panagpangta kontra iti presidente ken First Lady.
Laksid ti nakatuding a panag-convene ti senado kas impeachment court ita nga aldaw ti Lunes, imbaga ni Senate President Alan Peter Cayetano a posible nga inton Hulyo a mangrugi iti aktuwal a panagusig depende kadagiti naituding a proseso ken bilang ti session days.
Impaganetget pay ni Cayetano a suruten ti Senado iti agraraira a linteg ken awan kunana ti pannakaitantan iti proseso ti impeachment.
Kagiddan daytoy, pinaglibakanna dagiti ispekulasyon nga adda pakainaiganna iti panagbaliw ti liderato idiay Senado iti maipagarop a plano a lapdan wenno itantan ti impeachment trial kontra kenni Duterte.
