Inrekomendar ni Senador Bam Aquino nga adalen manen dagiti pondo a nakatukon para kadagiti flood control projects ditoy pagilian para ti tawen 2026.
Iti panagdengngeg ti Senate Blue Ribbon Committee ket kinuna ni Department of Public Works and Highways (DPWH) Secretary Manuel Bonoan a ti singasing a pondo para kadagiti flood control projects inton sumaruno a tawen ket dumanon ti P243-B.
Dinamag ni Senador Aquino nu adda dagiti proyekto a maipapasdek kadagiti lugar a flood-prone provinces agsipud ta adu kadagiti immun-una nga istruktura ket naipasdek kadagiti saan met a malaylayos a lugar.
Insungbat ti sekretaryo a dagiti proyekto kadagiti sumaruno a tawen ket nagduduma lugar ken posible a ti dadduma kadagitoy ket maipasdek kadagiti probinsya a saan a malaylayos.
Kinuna ni Bonoan a naibasar amin a public infra project kadagiti kiddaw ken proyekto ti tunggal legislative districts nga immunan a naaprobaran isu a dagitoy ket naka-distribute kadagiti nagduduma a paset ti pagilian a nagtaudan dagiti mamanday-linteg a nangisingasing kadagitoy.
Imbatad met ni Sen. Aquino a nasken a masublian ti pondo a nakapauneg iti National Expenditure Program para inton sumaruno a tawen ken adalen nu dagitoy ket maiyannatop kadagiti flood control project a maipasdek.
Nu mapasingkedan a saan met nga isu a kasapulan ket kinunana a rumbeng a makanselar dagitoy ken iyakar lattan dagiti pondo kadagiti sabali a lugar wenno proyekto.
Para met kenni Secretary Bonoan, nakasagana ti DPWH a tumulong nga adalen manen iti pondo nu daitoy iti consensus dagiti mamandayh-linteg.
Impaganetget ni Aquino nga adda pay oras tapno masublian ti aganay P240-B a pondo para ti tawen 2026, ita a panawenen para ti deliberasyon ti pondo kadagiti dua a balay pagpandayan-linteg.
