Impaganetget ni Presidential Sister Senadora Imee Marcos a nasken ket umuna wenno idauloan dagiti mamanday-linteg ti lifestyle check nga imbilin ni Presidente Ferdinand “Bongbong” Marcos Junior gapo paylaeng iti kontrobersiya dagiti maanomalya a flood control projects.
Impeksa met ni Senadora Imee a silulukat isuna a mangiruar ti Statement of Assets, Liabilities, and Net Worth wenno SALN agsipud ta public document met daitoy kasta met nga innayon a nasken a maimbestigaran pay dagiti negosyo ken adda iti maibalud nu mapaneknekan nga adda iti kinakusit iti maisayangkat a lifestyle check.
Kabayatanna, kinuna met ni Senadora Risa Hontiveros nga umanamong isuna a maipasidong ti lifestyle check kasta met a mangiruar ti SALN tapno mapasingkedan ti middle-class nga estilo na ti panagbiag.
Agtalek ni Hontiveros a makatulong ti lifestyle check tapno makissayan ti agraraira a korapsyon iti panagusar ti pampubliko a pondo para kadagiti proyekto ti gobierno.
Immuna metten a nangipeksa ti suporta ti liderato ti Senado iti pammilin a lifestyle check ti Presidente Marcos Junior ken kinuna ni Senate President Francis “Chiz” Escudero a nalawag nga adda iti basaran tapno ipatungpal daitoy nga addang.
Dinakamat na ti Article XI, Section 1 ti 1987 Constitution a nangibilin kadagiti adda iti serbisyo-publiko nga agbalin nga umno ken resonable iti trabaho da, agbiag a simple, ken agserbi nga addaan ti integridad.
Innayon na pay iti Section 8 ti Republic Act 3019 wenno Anti-Graft and Corrupt Practices Act a nakailanad iti panang-dismiss kadagiti opisyales a saan a mailawlawag ti baknang da; Kasta met iti Republic Act 1379 wenno ti Forfeiture Law a mangit-ited bileg iti gobierno a mangkumpiskar kadagiti ilegal a nagun-od a sanikua.
Inyunay-unay na iti Section 4(h) ti Republic Act 6713 wenno Code of Conduct and Ethical Standards for Public Officials and Employees a nainget a mangiparparit kadagiti opisyales ken kadagiti pamilya da a mangipakita ti nabaknang a panagbiag.
Mainaig iti daitoy, impaganetget ni Senate Deputy Majority Leader JV Ejercito a panawenen a mangipatungpal ti nainget a lifestyle check kadagiti opisyales ti gobierno, nangruna para kadagiti kameng ti Department of Public Works and Highways (DPWH) nu sadino ket rumrumuar iti imbestigasyon a sumagmamano nga empleyado ti ahensya ti addaan kadagiti nagkakangina a lugan ken bisyo a saan a maibatog kadagiti sueldo da.
