Nainget a pinaglibakan ni Senador Robin Padilla dagiti alegasyon a sikreto na nga inlibas paruar ti Senado ni Sen. Ronald dela Rosa kasaruno ti tensyonado nga insidente id napalabas a lawas.
Kinuna ni Padilla a normal ken natalged da a rimuar ti Senado ken awan ti aniaman a senyales a niliklikan da dagiti otoridad.
Imposible kunana a maaddaan ti gundaway a tumakas gapo iti strikto a presensya dagiti pulis, security personnel, ken CCTV cameras iti naglawlaw ti pasdek.
Inbinglay na a nagtalinaed isuna iti uneg ti Senado ti sumagmamano nga aldaw tapno kadwaen ni Senador dela Rosa kalpasan a bimmara ti sitwasyon iti panagbalbaliw ti liderato ken ti impeachment proceedings.
Kangrunaan a pakaseknan ni dela Rosa iti seguridad dagiti tao ti Senado, pakairamananen dagiti media ken empleyado.
Nakitaripnong pay ti Senador kenni Interior and Local Government Secretary Jonvic Remulla kasta met kenni Philippine National Police Chief Jose Melencio Nartatez Jr. tapno ipasiguro ti kinatalged iti lugar.
Innayon na met nga awan iti nakita da a warrant of arrest, isu nga awan iti rason a panunoten nga adda iti operasyon a panangarestar iti senador.
Inlawlawag na a nakigiddan laeng ni dela Rosa iti lugan na agsipud ta awan iti bukod na a lugan idiay Senado iti dayta a rabii.
Nagdessa-ag isuna sadiay Makati, nu sadinno ket sinabat isunan ti personal na a lugan.
Kinuwestiyon pay ni Padilla iti panangawag kenni dela Rosa a kas pugante ket kinuna a saan a maibagay iti nasao a termino nga awan met iti umiso a proseso.
Iti kangitingitan ti kontrobersiya ket nagpanawagan isuna a saan a gaburan ti pulitika dagiti napapateg a saritaan a kas iti trabaho, pasueldo, ken ti panaglaban kontra korapsyon.
