Kayat ni Senate Minority Leader Koko Pimentel nga agdoble-ingat iti publiko kadagiti agraraira nga scams ita a panawen ti bakasion.
Impakdaar ti senador ti nasaknap a scams ita a bakasion a mangbikbiktima kadagiti kailian nangruna ita ta ad-adda a masansan ti online shopping.
Binalakadan ni Pimentel ti publiko a surotenda ti pakaammo ti National Telecommunications Commission (NTC) tapno maliklikan ti panag-click kadagiti link a maaw-awat babaen kadagiti text messages gapu ta daytoy ket mabalin a mangikompromiso iti personal nga impormasion ken pinansial a seguridad ti maysa a tao.
Kinunana, pulos a ditay mangipatulod kadagiti mensahe a ditay ammo ti nagtaudanna.
Innayon ni Pimentel a kabayatan daytoy a panawen nasken nga aramaten ti utek gapu ta adu dagiti scammers nga agbirbirok laeng iti gundaway nga agkusit.
