Nangibinglay ni Senate Majority Leader Senator Francis “Tol” Tolentino ti pakaseknan na ti sumagmamano nga isyu ditoy pagilian pakairaman ti nangato a presyo ti kuryente, internet fee dagiti estudyante, ken national security kabayatan ti personal a panagbisita na ditoy istasyon ti Bombo Radyo La Union.
Segun kenni Senador Tolentino, ti kangrunaan a mangpapangato iti presyo ti kuryente ket iti Value Added Tax wenno VAT, nu sadino ket ti pagilian a Pilipinas ti adda kangatuan a singir a 12% para iti intero nga Asya.
Mainayon pay ditoy iti VAT ti produkto nga diesel nga us-usaren met dagiti dadduma a probinsya tapno pagtaudan ti kuryente.
Sigurado kinuna ti Senador nga agriri dagiti mangpatpataray iti kuryente ngem apaman maikkat ti VAT ket maigiddan metten a bumaba dagiti sabali pay a magagatang.
Kabayatanna, idi laeng aldaw ti Miyerkules ket inaprobaranen ti Senado iti Senate bill 2669.
Daitoy ket insingasing ni Senador Tolentino tapno papigsaen dagiti internet services kadagiti asideg ti pagadalan ken pampubliko nga establishyimento.
Mangipaay pay ti gakat ti diskuwento kadagiti ag-load nga estudyante babaen ti panangiparang laeng kadagiti IDs da.
Nu mainaig met iti seguridad ti pagilian, impannakel ni Senador Tolentino dagiti nabiit pay a napermaan a linteg ti Pilipinas.
Isuna iti principal author ti Philippine Maritime Zones Law ken ti Philippine Archipelagic Sea Lanes Act a nangituding kadagiti mabalin a pagdalyasatan dagiti barko.
Nupay kasta, kinunana a kurang ti pagilian kadagiti alikamen isu ket insingasing na iti agtultuloy nga alyansa ti Pilipinas kadagiti nagduduma pay a sabali a pagilian.
Pakairamanan kadagita a pagilian ket ti Japan, Estados Unidos, South Korea, ken Australia, a nakasagana a tumulong ken mangisayangkat kadagiti multilateral exercises.
Insingasing na pay iti konsepto ti panagarkila kadagiti barko a panggubat wenno warships.
Kinunana a ti panaggatang ti baro a barko ket danonen ti lima a tawen nu idasig ti panang-arkila nga innem a bulan laeng.
Segun iti Senador, kasapulan ti pagilian daitoy nga addang aglalo iti panagsaknap dagiti barko ti China ditoy uneg ti Exclusive Economic Zone ti Pilipinas.
Kabayatanna, agtalek met ni Senador Tolentino a ti panagbalin na nga abogado, dedikasyon, ken kapadasan na kadagiti tay-ak ti foreign relations, international affairs, militar, national defense, kasta met iti panagbalinna a Mayor iti Tagaytay ken nagserbi pay kas Metro Manila chairman ket umdasen tapno ikiddaw manen ti botos ita nga umadani a 2025 National, Local, and BARMM Elections.
