Nagsapata ni Senate Blue Ribbon Committee Chair Senador Rodante Marcoleta a nakasagana ti komite a makibinnulig iti Department of Public Works and Highways iti aramiden da nga imbestigasyon kadagiti ghost public infrastructure projects, aniaman a paset ti pagilian.
Inaklon ni DPWH Secretary Manuel Bonoan iti nasao nga hearing a nga adda a talaga dagiti ghost public infrastructure projects ditoy Pilipinas ngem impasiguro na dagiti serye ti imbestigasyon ti ahensiya kontra kadagiti karaman ti kaso tapno mapilaan ti pormal a reklamo.
Nakasagana met ni Senador Marcoleta a sumurot iti field validation nga aramiden ti DPWH tapno masiguro ti kaledad dagiti maipasdek nga istruktura, kasaruno ti nalawa nga imbestigasyon.
Kiniddaw ti senador kenni Secretary Bonoan a mangipabulod paylaeng daitoy ti maysa a backhoe tapno maysa-maysaen da dagiti project sites ken tingitingen nu nasurot metlaeng dagiti plano iti pannakaipasdek da.
