Namnamaen a sumrek iti Philippine Area of Responsibility (PAR) iti uneg ti 24 nga oras iti Severe Tropical Storm (STS) “Podul”, segun iti Philippine Atmospheric, Geophysical and Astronomical Services Administration (Pagasa) ita nga aldaw ti Dominggo, Agosto 10.
Maibasar iti weather forecast ti state weather bureau, iti STS “PODUL” ket agtultuloy a pumarpartak bayat nga agtaltalinaed iti pigsa daytoy.
No makastrek iti PAR, mapanaganan daytoy a “GORIO”.
Naudi a nasaripatpatan iti STS iti kaadayo a 1,615 kilometro Daya ti Extreme Northern Luzon ken adda iti ruar ti PAR.
Kabuyog daytoy ti maximum sustained winds a 110 km/h, kapegges a dumanon ti 135 km/h, ken addaan ti central pressure a 985 hPa.
Agdaldalyasat daytoy iti pa-Laud a direksyon iti kapaspas a 20 km/h, ken kapegges ti angin a dumanon ti agingana 280 km manipud iti sentro.
Agpalaud iti STS “PODUL” manipud ita nga aldaw ken inton bigat (Agosto 11) ken posible a dupagen na iti Laud-a-Laud wenno Amianan-a-Laud manipud Agosto 12 agingana kadagiti sumarsaruno nga aldaw.
Saan met a manamnama a direkta a makaapektar iti kasasaad ti panawen ken kabaybayan ti Pilipinas iti “Podul” iti las-ud ti sumaruno a lima nga aldaw.
Nupay kasta, posible a dumalan daytoy asideg wenno iti rabaw ti southern Ryukyu Islands inton Agosto 13 (Miyerkules) ken adda ti posibilidad nga ag-landfall idiay Taiwan iti malem wenno rabii ti kapada nga aldaw.
Kabayatanna, nagpalagip iti weather bureau iti publiko ken kadagiti opisina ti disaster risk reduction and management nga itultuloy a padaanan dagiti updates maipapan iti nasao a bagyo.#
