Nakasangpeten idiay Ninoy Aquino International Airport (NAIA) dagiti kakadua ti dismissed Bamban, Tarlac Mayor Alice Guo manipud Indonesia.
Segun iti Bureau of Immigration (BI), nagdisson idiay NAIA Terminal 1 iti agarup alas singko ti malem idi kalman, ti nagluganan ti kabsat ni Alice Guo a ni Sheila, ken Cassandra Li Ong, autorisado a pannakabagi ti Philippine Offshore Gaming Operator (POGO) a na-raid sadiay Porac, Pampanga.
Dagiti dua ket kinadwa dagiti operatiba ti intelligence division (ID) ti Bureau of Immigration ken fugitive search unit (FSU).
Kinuna ti Bureau of Immigration nga impakita ti impormasion ti intelligence a tinulongan ti maysa a lalaki a taga Singapore ti grupo ni Guo a nangi-book iti panagyanda idiay Indonesia.
Pumanaw koman dagiti dua idiay Batam idi ma-intercept dagitoy.
Iti National Bureau of Investigation (NBI) ti mangasikaso kada Ong ken Sheila Guo tapno ag-debrief kadakuada bayat a mangisayangkat ti Bureau of Immigration iti inquest proceedings ken ni Sheila Guo gapu kadagiti Immigration charges.
Sumaruno iti daytoy, makikoordinar ti National Bureau of Investigation iti Senado ken Kamara mainaig kadagiti inpaulog da nga arrest orders.
Nakikoordinaren ti Senate Office of the Sergeant-at-Arms iti Manila International Airport Authority (MIAA) para iti pannakaiserbi ti arrest orders kontra iti kabsat ni Guo.
Karaman ni Sheila Guo kadagiti personalidad nga imbilin ti Senado a maaresto idi napan a Hulio.
Nangipaulog ti House of Representatives iti order a mangala iti kustodiya ni Cassandra Li Ong gapu ta naiserbian daytoy iti contempt order gapu iti agtultuloy a saanna a panagatendar iti imbestigasion kadagiti krimen a mainaig iti POGO.
Segun iti pannakangiwat ti Presidential Anti-Organized Crime Commission a ni Dr. Winston Casio, awanen idiay Indonesia ti kabsat ni Alice Guo a ni Wesley Guo.
Immunan nga imbaga ni Senador Risa Hontiveros a pimmanaw ni Guo, a nabigbig met a kas Chinese national a ni Guo Hua Ping, iti pagilian idi Hulio 18.
Kinuna ni Casio a napan ni Guo idiay Kuala Lumpur, Malaysia idi Hulio 18, ken naglugan iti eroplano idiay Singapore idi Hulio 21.
Naipadamag a napan isuna idiay tapno sarungkaran ti tatang na a ni Guo Jian Zhong, ina na a ni Lin Wen Yi, ti kabsatna a ni Wesley Guo ken Cassandra Ong, ti nainaganan a pannakabagi ti naraut a POGO hub sadiay Porac, Pampanga Lucky South 99.
Idi Agosto 18, nagbiahe isuna manipud Singapore agingga idiay Batam, Indonesia babaen ti ferry boat.
Kabayatanna, patienda Casio nga adda pay laeng ni Guo idiay Indonesia.
