BR LA UNION – Inaklon ni sigud a Department of Public Works and Highways (DPWH) Secretary Rogelio Singson nga indiaya kenkuana ti Palasyo ti Malakanyang nga agsubli iti ahensiya iti tengnga ti kontrobersiya seknan dagiti naanomalyaan a flood control projects ditoy pagilian.
Segun kenni Singson, agtawen ti 76, personal dagiti rason na nu apay a saanna a mabalin nga awaten ti diaya.
Nupay makuna a seryoso, ngem mabalin met a pa-angaw ti imbaga na a panawan isuna ti asawa na nu agsubli iti gobyerno.
Maipalagip a nagserbi a sekretaryo ti DPWH ni Singson, manipud 2010 agingga 2016, panawen ti administrasyon daydi President Benigno Aquino III.
Kalpasan ti termino na, nagsubli daytoy iti pribado a sektor agingga ti agdama.
Imbaga ni Singson nga iti panagsarak da kenni Presidente Ferdinand Marcos Jr. impeksa na a malidayan ti mapas-pasamak ita iti naggapwan na nga institusyon, gaputi aramid ti sumagmamano a bulok nga opisyal iti departamento.
Kinuna na a maasyan kadagiti napudno ken professional engineers ti DPWH a na-bypass a mairam-raman ita iti kontrobersiya.
Inbutaktak ni Singson, nga idi panawen na ket naka-kumpleto ti proyekto nga adda iti sidong ti flood control master plan, nga agbalor ti P351 billion.
Dayta kunana ti rumbeng koma a masurot, ngem saan a natungpal, nga uray nalpasen a naisumite ti master plans.
Impaganetget ti sigud a DPWH chief a saan da nga inabandonar ti master plans, nudiket, adda laeng iti DPWH, ken nai-turnover iti simmukat kenkuana a Public Works Secretary nga itan ket Sen. Mark Villar idi panawen ti Duterte administration.
Immunan nga imbaga ti Malacañang nga awan ti naawat ti DPWH a master plan idi nadutukan ni Bonoan iti ahensiya.
Segun kenni Singson, mas pilyen na nga akseptaren a mangidaulo ti maysa nga independent ken third-party body a mang-repaso kadagiti DPWH projects, kadwa na iti nongovernment organizations, civil society groups ken media.
Kinarit na pay dagiti kongresista nga isardeng wenno isuspinde iti praktis dagitoy a last-minute “insertions” kadagiti flood control projects iti national budget.
