Nakapasa iti 2022 Bar Examinations ti maysa a sigud a government ken private employee iti probinsya a La Union.
Ni Atty. Manuel Rey B. Littaua II ket maysa kadagiti napagasatan. Residente isuna ti Barangay Poblacion, Bacnotan, La Union ken ma-ika dua nga anakda ti nagannakna nga isuda Mr. ken Mrs.Reynaldo ken Ma. Elena Littaua.
Nagturpos iti Saint Louis College Carlatan, ditoy syudad ti San Fernando iti kurso a Bachelor of Science in Commerce major in Banking and Finance idi tawen 2010.
Apaman a makaturpos ti panagadalna ket nagtrabaho iti maysa a government agencies ken nagbalin pay nga empleyado ti pribado a kompanya iti nadumaduma a lugar.
Idi tawen 2016, nag-enroll ti College of Law Juris Doctor idiay pagadalan a Don Mariano Marcor Memorial State University ditoy syudad iti lima a tawen.
Immuna a nag exam idi 2021 ngem napaay a makapasa agingga a nagsardeng a nagtrabaho tapno maipamaysa na ti panag-review.
Naisayangkat ti 2022 Bar Examination idiay Saint Louis University, Baguio City idi napalabas a tawen ket ti oath taking ket inton Mayo 2, 2023 iti Philippine International Convention Center.
Napalaos met ti ragsak a narikna na kalpasan a maysa isuna manipud iti 3,992 a nakapasa ti BAR.
Nagyamanan pay ti pamilyana a nangipaay ti suporta kenkuana kagiddan ti panangallukoy na kadagiti saan a nakapasa a saan nga mapukawan ti namnama.
Kabayatan na, kinablaawan met isuna ti Bacnotan LGU.
