Inlibak ti retirado a Regional Trial Court Judge ken agdama a chairman ti Philippine Charity Sweepstakes Office (PCSO) a ni Felix Reyes iti akusasyon ti panang-areglo dagiti kaso para iti negosyante a ni Charlie “Atong” Ang.
Maipalagip nga immunan nga inakusaran ti whistleblower a ni Julie Patidongan alyas Totoy ni Reyes ti maipagarop a panagbiyahe na abroad kadua dagiti prosecutor ken dadduma pay a judges para iti panang-areglo ti kaso.
Kinarit ti retirado a judge ni alyas Totoy a nadakamaten iti partikular a kaso ni Ang wenno siasinoman nga adda pakainaigan na iti kaso dagiti mapukpukaw a sabungero, nga iti ammo na ket nakapenpen pay laeng idiay korte.
Balakad ni Reyes nga agulimek laengen ni alyas Totoy kangrunaan no awan ti pammaneknek na nga inareglo na dagiti kaso.
Adda met iti pammalubos ti retired judge iti Bureau of Immigration nga iruar dagiti nagbalin a biyahe na iti sabali a pagilian manipud idi nagretiro isuna idi Oktubre 2021.
Agtaktaka met ni Reyes no apay ta naigiddan dagiti akusasyon ni alyas Totoy kontra kenkuana kalpasan iti panangipila na ti aplikasyon para iti posisyon ti Ombudsman.
Iti laksid daytoy, nakasagana ni Reyes a makitinnulong iti aniaman nga imbestigasyon tapno malawlawagan dagiti awan basaran na nga alegasyon ken mawayawayaan iti korte ken prosekusyon manipud kadagiti pammadakes.#
