Saanen a nasdaaw ni Atty. Virgilio Ligutan iti desision ti Quezon City Regional Trial Court Branch 81 nga ibasura iti petision ni Atty. Mans Carpio nga addaan panggep nga ipasardeng iti impeachment hearing kontra kenni Bise Presidente Sara Duterte.
Segun kenni Ligutan, maysa kadagiti complainant maibusor iti bise presidente, ipakpakita ti desision nga awan ti nalabsing a linteg wenno proseso iti House Committee on Justice iti maisaysayangkat a proceedings.
Impaganetgetna pay a legal iti pannakaipaulog ti subpoena kadagiti rekord ti agassawa a Duterte ken Carpio, maisupadi iti panggep ti kampoda.
Karaman kadagiti nakiddaw a dokumento ket ti Statement of Assets, Liabilities, and Net Worth (SALN), bank records, ken ti Anti-Money Laundering Council records.
Maibasar iti desision ti korte, awan iti hurisdiksion ti RTC a mangsinga iti bileg ti House of Representatives a mangisayangkat ti impeachment proceedings, maitunos iti Konstitusion.
Segun pay ti korte, addaan ti bileg iti House panel a mangiruar ti subpoena kas paset ti mandato nga impaay ditoy ti Konstitusion.###
