Naan-anayen a linteg ti singasing nga isardengen ti panagusar iti mother tongue kas lengguahe a panangisuro kadagiti Kindergarten agingga Grade 3.
Daytoy ket kalpasan a nagbalin a linteg ti singasing gapu ta saan a pinirmaan ni Presidente Ferdinand Marcos Junior, 30 nga aldaw kalpasan a naawat daytoy iti opisinana.
Iti babaen ti Republic Act 12027 wenno An Act Discontinuing the Use of Mother Tongue as Medium of Instruction, maisubli ti lengguahe a panangisuro iti Filipino ken Ingles idinto nga agserbi met ti mother tongue a kas auxiliary media of instruction.
Nakalanad iti Section 2 ti linteg a mabalin a mausar ti mother tongue-based multilingual education ken monolingual classes kadwa dagiti dadduma pay a requirement kas iti monolingual class ket nasken a buklen dagiti estudyante nga agpapada iti mother tongue ken naka-enrol iti agpada a grade level iti isu metlaeng a school year.
Masapul a mangbukel ti Department of Education babaen ti pannakiuman iti Filipino Language Commission (KWF) iti language mapping policy iti uneg ti maysa a tawen manipud iti effectivity date ti linteg.
