Nakasangpeten ditoy pagilian ti siam a Pilipino a biktima ti human trafficking sadiay Laos.
Segun iti Department of Migrant Workers, isuda ti umuna a batch manipud iti pakabuklan ti 73 a biktima a Pilipino a naisalakan manipud iti Golden Triangle Special Economic Zone iti probinsia ti Bokeo idiay Laos a maibilang a scam syndicate.
Segun iti ahensia, ti nadakamat a bilang dagiti trabahador ket naikari-an iti panggedan kas customer service representatives idiay Thailand ken napuersa isuda a mangisayangkat kadagiti scamming activities idiay Laos.
Mainaig iti daytoy, impanamnama ni Migrant Workers Secretary Hans Leo Cacdac nga ipaay ti gobierno ti tulong para kadagiti naisalakan a Pilipino.
Makikadua ti Department of Migrant Workers iti Overseas Workers Welfare Administration, ken ti Inter-Agency Council Against Trafficking iti panangipaay iti pinansial a tulong.
Mangipaay pay daytoy iti libre a psycho-social support, legal assistance ken dadduma pay a serbisio.
Kabayatanna, indauluan ti Department of Foreign Affairs ti pannakarescue dagiti biktima.
