LA UNION – Dinisiplina ni Mr. Manuel Avecilla, Kapitan ti Barangay Nagsimbaanan, Bacnotan, La Union ti Sangguniang Kabataan Chairman ken dagiti miembro na kasaruno iti kaawan partisipasyon da kadagiti aktibidad ti barangay.
Intali ni Kapitan Avecilla ti net iti basketball ring kas panangdisiplina na kadagiti agtutubo a ti agay-ayam laeng iti pagpartakan da ngem awan met iti ambag da kadagiti programa ti gobierno maipapan iti kinadalus, HAPAG wenno ti “Halina’t Magtanim ng Prutas at Gulay,” kasta met iti road clearing a masapul la unay iti partisipasyon ti Sangguniang Kabataan.
Dagiti nasao a programa ti Department of the Interior and Local Government ket agkasapulan kadagiti dokumentasyon ti partisipasyon ti am-amin a kameng ti barangay. Tarigagay a mintiniren ni Kapitan Avecilla ti panagbalin a National Awardee ti Barangay Nagsimbaanan ti Seal of Good Local Governance ken dadduma pay a pammadayaw nga isuda ket runner up.
Idawdawat ita ti Kapitan iti panagtungpal ti Sangguniang Kabataan ti akem da nangruna ta naibutaktak na a ti Chairman ket aganay tallo a bulanen a saan a dumardar-ay ti aniaman a panagtataripnong ken aktibidad isu a maiguyguyod pababa ti pakabuklan a performance ti Barangay Nagsimbaanan.
Maysa ti ili ti Bacnotan, La Union kadagiti muti-awarded municipalities ditoy Pilipinas: daitoy laeng ti kakaisuna a national nominee kadagiti Lokal a Gobierno ditoy Ilocos Region iti Parangal: Gawad ng Kahusayan sa Komunikasyong Pampubliko, malaksid iti dayta ket ti panagbalin da a Literacy Champion ti National Literacy Award 2022-Regional Level, Philippine Model Municipality, National Literacy Awards 2024, ken pagaammo pay gapo iti moderno a merkado publiko da nga addaan iti elevator.
Ti ili ket idadauloan ni Mayor Divine Fontanilla a maysa met kadagiti signatories ti Mayors for Good Governance, kadwa ni Baguio City Mayor Benjamin Magalong. Daitoy ti rason nu apay a kasta lattan a ka-dedikado dagiti lider ti tunggal barangay a maparang-ay ken mapadur-as pay ti Municipalidad ti Bacnotan, La Union.
