LA UNION – Maisagsaganan ti kaso nga panaglabsing iti RA 9165 wenno Comprehensive Dangerous Drugs Act of 2002 kontra iti maysa a Sanguniang Kabatataan Kagawad (SK) iti insayangkat nga anti-illegal drugs buy bust operation dagiti otoridad idiay Barangay Ipet, Sudipen, La Union.
Nabigbig ti suspek a ni Hernan Dusayen, 18, SK Kagawad, Grade 11 ti Sudipen Vocational High School, newly identified drug personality, ken residente ti Barangay Apaya, Alilem, Ilocos Sur.
Immuna ditoy, nakaawat ti impormasyon ti Sudipen Municipal Police Station a maipagarop nga agilaklako ti suspek ti droga iti nasao a pagadalan.
Malaksid iti (1) plasctic sachet ti maipagarop nga dried marijuana fruiting tops ken P300 buy bust money ket nakagatang pay ti (2) plastic sachet ti dried marijuana fruiting tops dagiti otoridad manipud iti suspek.
Iti agdama, agtaltalinaed pay laeng iti kustodiya dagiti otoridad ti suspek kabayatan nga agtultuloy ti interogasyon kontra kenkuana.
