Suportado ni Representative Brian Raymund Yamsuan ti plano ti Philippine National Police (PNP) a gumatang kadagiti body-worn-cameras nga addaan iti artificial intelligence (AI) capabilities.
Kinuna pay ni Yamsuan a kasapulan met ti panagpuonan ti PNP iti pannakaisayangkat ti trainings para kadagiti personnelda para iti umno a pannakataming, pannakaipila ken pannakaidulin dagiti video footages kadagiti nadakamat nga alikamen tapno masigurado a saan a ma-tamper ken maaramat to daitoy nga ebidensia iti korte kontra iti suspek.
Indagadag pay ni Yamsuan iti PNP a palawaen ti panagusar iti digitalized crime reporting system ken dadduma pay a technological innovations tapno maparegta ti pannakipaset dagiti umili iti pananglapped ken pananglaban iti krimen.
Segun kenni Yamsuan, dati nga opisyal ti Department of the Interior and Local Government (DILG), makatulong ti panagusar kadagiti teknolohia a mangpasayaat ti performance ti PNP ken mangbukel ti panagtalek ken kumpiyansa ti publiko iti organisasyon ti pulisya.
Dinayaw met ni Yamsuan ti PNP babaen ti panangidaulo ni General Rommel Marbil iti immuna a panangiruarna iti Metro Manila iti Law Enforcement Reporting and Information System (LERIS), maysa a digitalized policing app a mangipalubos iti publiko a mangireport kadagiti vulnerabilities -suspect incidents ken crimes babaen ti telepono.
Kinuna ni Yamsuan a rumbeng a mairugi ti information drive iti social media tapno mapamiliar ti publiko iti panagusar iti LERIS babaen ti eGovPH.
