Pinaneknekan ni Ms. Arlyn Bambico, Principal iti San Fernando South Central Integrated School a pudno iti imbaga ni President Ferdinand Marcos Jr., a maipat-patungpalen dagiti proyekto para iti pagsayaatan ti sektor ti edukasyon.
Iti eksklusibo nga interview ti Bombo Radyo La Union kenni Bambico, kinuna na a madama ti pannakaipasdek dagiti kanayunan a classrooms kadagiti naduma-duma a pagadalan ditoy Rehiyon Uno ken intero a pagilian.
Kinuna na, nga iti idadaulwanna ita nga eskuwelaan ti Barangay Tanqui, City of San Fernando ket adda manen ti additional a 24 classrooms a maipasdek ita a tawen.
Daytoy ket malaksid laeng kadagiti pasilidad ken arwaten nga usaren ti eskuwelaan para iti panagisuro ken panagadal dagiti estudiyante.
Pattien ni Bambico a fully support ti gobyerno iti edukasyon ditoy pagilian, nangruna ita a ni Vice-President Sara Duterte iti mangidadaulo ti Dept. of Education.
Awan kunana ti problema iti suweldo dagiti teachers agsipudta tinawen a ngumato, malaksid laeng kadagiti dadduma pay a benipisyo nga aw-awaten dagitoy.
Para kenni Principal Bambico, “very happy” iti panangimaton ti agdama nga administrasyon.
