Inarestar dagiti otoridad ti maysa a South African national kalpasan a matakuatan kenkuan ti aganay P47.6-M a gatad ti shabu iti Terminal 3 ti Ninoy Aquino International Airport (NAIA) idi aldaw ti Sabado, Agosto 16.
Nabigbig iti suspek iti alyas “Antonie” a simmangpet iti eropuerto agarop alas-7:30 ti rabii sakay iti Cathay airways Flight CX 748 manipud Hong Kong.
Maibasar iti inisyal nga imbestigasyon ti Philippine National Police Drug Enforcement Group (PDEG), ginandat nga ipuslit ti gangganaet ti nasurok-kumurang a 7K gramo ti shabu.
Kalpasan a naarestar iti suspek ket dagos metlaeng a nai-turn over iti Philippine Drug Enforcement Agency (PDEA) Laboratory Service dagiti kontrabando na para ti pannakaipasidong ti qualitative ken quantitative examination ken umiso a disposisyon.
Kabayatanna, sumangsango met iti South African ti kadagiti kaso nga adda pakainaigan na iti panaglabsing ti Comprehensive Dangerous Drug Act nga addaan iti probisyon a maiparit iti importasyon kadagiti ilegal a droga.
