Pinasingkedan ti South Korea a nagpaputok da ti warning shots kontra kadagiti soldado ti North Korea iti nagbeddengan ti pagilian da.
Napasamak ti insidente idi malem ti Martes, Agosto 19 iti kangitingitan ti maar-aramid a konstruksiyon North Korea kadagiti barikada da manipud pay idi napalabas a tawen para iti permanente a pannakaiserran ti border da iti South Korea.
Imbatad ti South Korean joint chief-of-staff nga inaramid da ti nasao nga addang kalpasan a nagballasiw dagiti soldado ti North Korea iti military demarcation line wenno limitation marking iti boundary. Immatras metlaeng a sigud dagiti soldado kalpasan ti panagpaputok da ti warning shots.
Inwaragawag ti state media a kinuna ni North Korea Army Lieutenant Gen Ko Jong Chol a nangusar ti Seoul military ti machine gun para ti panagpaputok kadagiti sangapulo a warning shots iti soldado da.
Ti panangipubliko iti insidente ket nairanta ti panagpanaw ti South Korean President a ni Lee Jae Myung manipud idiay Seoul para ti panagbisita na idiay Japan ken Estados Unidos.
Agingga ita ket nagudwa pay laeng ti Korean Peninsula manipud iti nagyera da a nagleppas idi tawen 1953.
Awan latta iti maitantandudo wenno agraraira a peace treaty ti nagbaetan dagitoy a pagilian isu nga adda da latta iti “state of war,” nupay manon a dekada ti napalabas a saan da a nagrinnaut.
