Kayat ni Deputy Speaker Yasser Balindong ti Lanao del Sur nga agpakawan ni Baguio City Mayor Benjamin Magalong iti Moro community gapo iti panangusar na ti sao a “moro-moro” tapno tagibassiten ti imbestigasyon ti Kamara seknan kadagaiti flood control projects.
Impaganetget ni Balindong a nupay natural iti demokrasya ti nagduma nga opinyon ket saan latta a maiparbeng nga usaren na iti “moro-moro” kas panagraem metten iti kultura ken kinapudno a nairamuten iti pakasaritaan ti pagilian.
Inlawlawag ti mamanday-linteg a ti Moro-Moro ket maysa a pabuya idi panawen ti Espanyol a maus-usar tapno tagibassiten dagiti Muslim.
Innayon na a kas lider ket nasken nga ibabawi ni Magalong iti waragawag na tapno maipakita iti panangpadayaw iti sabali a kultura.
Mainiag iti daitoy ket pinatibker ti Deputy Speaker iti kredibilidad ti isaysayangkat nga imbestigasyon ti Kamara a kinunana ket umuna palaeng a paset.
Nabiit pay a naidatag ti Tri-Committee a buklen dagiti komite ti Public Accounts, Good Government and Public Accountability, ken Public Works and Highways — tapno idauloan ti imbestigasyon ti P545-B flood control program.
Nupay saan pay a nangrugi ti pormal a panagdengngeg, immunan a nangiyuswat ti DPWH ti Committee on Public Accounts. Inyunay-unay ni Balindong a ti proseso ket tapno malawlawagan iti am-amin kasta met a maitandudo ti linteg ken pagsungbatan.