Inlawlawag ni Mr. Francisco Pentecostes, Branch Manager ti Social Security System ditoy La Union ti sumagmamano a pakaseknan dagiti residente ti probinsya mainaig ti panagaplikar ti calamity loans.

Laksid dagiti adu a nairekord a perdisyon ti opisina SSS gapo iti Bagyong Emong ket dagos dagitoy a napirmis tapno agtultuloy latta iti operasyon ken maipadanon iti serbisyo publiko para kadagiti umili.

Mainaig iti daitoy ket adda metlaeng dagiti empleyado da a nadadaelan ken naka-avail metten ti special emergency leave a lima nga aldaw tapno maipaayan iti oras ti panangpirmis kadagiti babbalay da.

Maipalagip a naipasidong ti probinsya ti La Union ti state of calamity nga isu metten ti nagbasaran ti SSS tapno ipatungpal ti calamity loan program manipud Agosto 6 nga agpaot agingga Setyembre 4 para ti tallopulo nga aldaw nga aplikasyon.

Kabayatan ti pannakiuman ti Bombo Radyo La Union kenni Mr. Pentecostes ket inbinglay na dagiti kwalipikado nga agaplikar kasta met nu kasatno iti pamay-an da.

Dagitoy dagiti kwalipikado:

  1. Amin a miembro ti SSS a nagsagaba ti perdisyon kadagiti sanikua da ditoy probinsya
  2. Kasapulan ket addaan ti 36 a bulan a kontribusyon ken 12 a bulan a tuloy-tuloy a panagtinnag
  3. Nasken ket updated iti panagbayad da kadagiti sabali pay a loan programs

Kinuna ni Mr. Pentecostes a via online itan ti aplikasyon ngem kasapulan ket nakarehistro pay nga umuna iti “my.sss” ken naka-upload iti bank account da a pakadepositoan iti loan.

Innayon na a nu ’employed’ ket kasapulan a maaprobaran ti loan ti tallo nga aldaw tapno saan a ma-back to zero.

Maadaan met a dagus ti immediate approval dagiti self-employed wenno voluntary members ken urayen lattan a sumrek iti bank accounts da ti loan iti las-ud ti lima agingga walo nga aldaw.

Kabayatanna, imparegta ni Pentecoste a nu adda iti problema ti internet ket nawaya iti opisina ti SSS La Union tapno personal a matulongan dagiti agtarigagay nga agaplikar ti calamity loan, kangrunaan na kadagiti nalipatan dan dagiti passwords ken user IDs da kasta metten dagiti nagsukat ti numero, nu kasta ket mai-reset ken maalalayan isuda dagiti personnel ti ahensya.