BR LA UNION – Naragsak nga irepresentar ni Cherry Bell Moskito, maysa nga student journalist, iti pagadalan da a Casacristo National High School idiay Bangar, La Union para iti maisayangkat a newswriting competition.
Imbinglay ni Moskito iti Bombo Radyo a sipud pay kina-ubing na ket nakitaanen ti inana ti talento a kas ti maysa a reporter, gaputa bibo ken nalaing nga agsao.
Kinuna na a babaen kadagiti kapadasanna iti naduma-duma a kompetisyon iti panagi-padamag, napaneknekanna a pudno nga addaan isuna ti kabaelan iti nasao a tay-ak.
Kinuna pay ni Moskito, a napateg ken makatulong iti panangidur-as ti ammo ti maysa nga estudyante ken agtutubo nu adda panagtalek iti bukod a bagi ken kabaelan, nangruna nu adda ti suporta manipud iti pamilya, ka-eskuwela, ken gagayyem, tapno magun-od ti panagballaygi iti biag.
Mensahe ni Moskito kadagiti padana nga estudyante, iti bassit a banag ket mapagbalin a dakkel ti epekto na iti komunidad nu ipakat iti nasayaat a wagas.
Makipaset ni Moskito iti Newswriting Competition, ket maysa daytoy a dakkel a gundaway tapno maipakita ti kabaelanna iti panagsurat ti damag ken responsable a panagipadamag.
Kinunana nga agtultuloy ti panagensayo kadagiti kakadwa na a makisalip tapno napigsa ti armas da iti panagturong da iti pudno a kompetisyon.
Innem a pampubliko a pagadalan a pakairamanan ti Casacristo National High School ti makipaset iti maangay a Bangar District Press Conference 2026 inton Sabado, Enero 31, 2026.
Dagiti kategorya a paglalabanan dagiti student journalists ket iti Mobile Journalism, Editorial Writing, Column Writing, Science Writing, Sports Writing, Feature Writing, Copyreading, Headline Writing, Photojournalism, Editorial Cartooning, News Writing, Radio Scripwriting, ken Radio Broadcasting.
