Madama itan ti forensic analysis ti narekobre a submarine drone iti kabaybayan ti San Pascual, Masbate nga agpaot ti innem agingga walo a lawas.
Segun kenni Philippine Navy spokesperson for the West Philippine Sea Rear Admiral Roy Vincent Trinidad, naala ti submarine nga adda iti non-operational status.
Addaaan daitoy ti color combination a yellow, red, ken orange a gagangay a maus-usar kadagiti scientific purposes. Daytoy ket 3.5 metro ti kaatiddogna, 24 cm ti diametrona ken agdagsen iti 94 kilos.
Segun kenni Trinidad, mausar ti kastoy nga alikamen ket pangurnong iti bathymetric data kas iti temperatura, kaadalem, ken kinaapgad ti danum.
Manipud ti inisyal a pananganalisar, commercially designed ken agparparang pay a nairuar daitoy manipud iti maysa a mother ship.
Maibasar pay iti open source, China ti makuna a manufacturer. Ngem segun iti Ph Navy, kasapulan pay laeng ti hard scientific evidence tapno maibaga no sadino ti aktual a naggapuanna.
Kabayatanna, saan a daytoy ti umuna a gundaway a nakarekobre iti kastoy a klase ti equipment iti Exclusive Economic Zone (EEZ) ti Pilipinas.
Segun kenni Trinidad, kadawyan a maal-ala dagiti nasao nga equipment kadagiti northern islands ken eastern seaboards.
Impaganetget ti Armed Forces of the Philippines (AFP) nga ibilangda daytoy a serioso a banag ken itultuloyda nga itungpal ti mandatoda tapno masigurado a natalged ti teritorio ti Pilipinas.
