BR LA UNION – Pinili ti sumagmamano a deboto nga ag-Visita Iglesia iti asideg a simbaan ita a Semana Santa iti tengnga ti mapaspasaran a nangato a presyo iti langis.
Eksklusibo a na-interview ti Bombo Radyo iti grupo da Josie Chua iti panagbisita da idiay St. Francis of Assisi Church idiay siyudad ti Mandaluyong.
Segun iti deboto a ni Josie, nabayagen nga ar-aramiden da ti Visita Iglesia ngem saan a kas iti naglab-labas a tawen, a makadanon da iti adayu a lugar kas idiay Tagaytay, ita a tawen ket pinili da laengen nga agbisita iti pito a simbaan idiay Metro Manila gaputi nangina a langis.
Imbinglay pay ni Miss Josie a nagbalinen a paset ti tradisyon da nga agturong iti naduma-duma a simbaan iti panawen ti Semana Santa, tapno pagyamanan ti Diyos kadagiti parabor wenno inted na a bendisyon kalpasan ti pannubok a naglabasanna kas maysa a cancer survivor.
Iti Visita Iglesia wenno panagbisita iti pito a simbaan sakbay wenno tunggal Semana Santa ket paset iti debosyon dagiti Romano Katoliko tapno agkararag, agminna-minna ken lagipen iti panagtutuok ni Hesukristo, a nangsubbot ti sangkata-wan.
