Sumagmamano pay a senador ti nangiyebkas iti panangbusorda iti Senate Bill 1979 wenno ti Prevention of Adolescent Pregnancy Bill nga itantandudo ti Senado.
Makuna a lapdan ni Senador Ramon “Bong” Revilla Jr. ti pannakaipasa ti kastoy a gakat nga idurduron ni Senador Risa Hontiveros.
Kas maysa a nagannak nga addaan iti annak ken appo, kinuna ti senador nga aramidenna amin a kabaelanna a mangsalaknib kadagiti agtutubo manipud kadagiti naalas a banbanag.
Kinunana a nasken a tamingen ti kumarkaro a parikut ti panangrames dagiti ubbing kadagiti pada da nga ubbing, panagbalin dagiti ubbing a nagannak iti nasapa pay nga edad, ken ti kinaliway dagiti ubbing nga ina.
Malaksid iti daytoy, adayo met ti Senate Bill 1979 nga itantandudo ni Hontiveros nu maidasig ti Senate Bill 1209 nga inpila na para iti pannakasalaknib kadagiti agtutubo manipud kadagiti aktibidad nga agresulta iti nasapa a panagsikog ken suporta ti gobierno kadagiti adolescent parents.
Kimmontra met ni Senate Committee on Basic Education Chairman ni Senador Sherwin Gatchalian iti sumagmamano a linaon ti singasing ni Hontiveros.
Gapu ta adda dagiti saan a panagtutunos iti agdama a comprehensive sexuality education babaen ti DepEd Order 31, kinuna ni Gatchalian a repasuenda daytoy inton sumaruno a lawas.
Nupay inyebkas ni Gatchalian ti ibubusorna iti nasao a gakat, patienna nga inton dumteng dagiti amendments wenno debate iti plenario ti Senado ket mabaliwan to pay ti singasing.
