BR LA UNION – Pinaglibakan ti sumagmamano a mammanday-linteg idiay Kamara a maysa a pormal a sungbat ti insubmitir ni Bise Presidente Sara Duterte kadagiti impeachment complaints a sangsangwenna, idinto nga ipapilit ti kampo ti Bise Presidente a saan a patas ti pannakatrato ti kasona.
Segun kenni Batangas Rep. Gerville Luistro, chairperson ti House Committee on Justice, iti insumite a consolidated verified answer ni Duterte ket saan a sungbat kadagiti alegasyon ngem ketdi arigna a maysa laeng nga addang tapno maibasura dagiti reklamo.
Inlawlawag ti mammanday-linteg a gaputa saan a direkta a sinungbatan ti Bise Presidente dagiti isyu, maibilang daytoy kas general denial ken agtalinaed a nakatakder dagiti alegasyon kontra kenkuana.
Daytoy ket sinuportaran da La Union Rep. Paolo Ortega V ken Manila Rep. Joel Chua, a nangibaga nga aglemlemmeng laeng ti bise presidente iti likudan dagiti teknikalidad imbes a mangidatag iti ebidensiya.
