BR LA UNION – Inallokoy ni Supreme Court Associate Justice Maria Filomena Singh dagiti babbai a pulis a tumakder ken agbalin a boses para iti karbengan dagiti babbai ken tumulong iti panangbaliw ti imahe ti pulisiya.
Iti insayangkat nga aktibidad ti National Police Commission ken Police Regional Office 4-A itay nabiit, binigbig na iti napateg a papel dagiti babbai iti panang-sukog ken panangpabaro ti panangipatungpal ti linteg.
Panawagan na kadagiti babbai a pulis a punasen iti imahe dagiti babbai a nakapsot, apektado ti emosyon, ken agpatingga laeng iti trabaho ti balay.
Binigbig na pay iti napateg a papel dagiti babbai partikular iti panang-sukog dagiti annak isunga impalagip na iti maka-alarma a panagadu ti kaso a rape, nangruna kadagiti ubbing.
Rinaem ni Associate Justice Singh dagiti programa a manglaban ti kinadamsak kadagiti babbai ken nainget nga implementasyon ti Republic Act No. 9262 wenno Anti-Violence Against Women and Their Children Act of 2004.
Kinarit na pay dagiti babbai a pulis a labanan ti kinakusit ken agserbi a rupa iti panagbalbaliw iti imahe ti Philippine National Police.
