BR LA UNION – Dimmatag iti Luna Police Station idiay Luna, La Union ti maysa a mannalon gaputi maipagarop a panangbekkel ti suspek nga armado ti kutsilyo.
Iti biktima ket nabigbig iti nagan a Norberto Palaboy, agtawen 53, addaan asawa, ken residente ti Brgy. Busel Busel, Luna La Union.
Nabigbig met ti suspek iti nagan a Reynaldo Carbajal, 47-anyos, addaan asawa, mekaniko ken residente ti nasao met laeng a barangay.
Maibasar iti police report ken base iti salaysay ti biktima, nakatugaw daytoy iti igid ti kalsada ti barangay idi maipagarop a kumprontaren ti suspek.
Awan ti nabatad a rason, kellaat a binekkel ti suspek iti biktima ken maipagarop a nangasut pay ti kutsilyo manipud iti siket na kasaruno ti panangiduron na daytoy ket napa-idda iti daga.
Maipagarop a nangisawang pay ti nadadagsen a sarita ti suspek kontra iti biktima.
Gaputi dayta, binalakadan dagiti otoridad ti biktima a mangipila ti reklamo iti barangay ket naikkan met daytoy ti Certificate to File Action babaen kenni Kapitan Cipriano Pascua ti Brgy. Busel Busel Luna,La Union.
