Naarestar dagiti tallo nga opisyales ti North Korea kalpasan ti aksidente a launching ti agingga 5K tonelada a warship idiay Chongjin idi aldaw ti Miyerkules, segun iti damag manipud Korean Central News Agency (KCNA).
Inawagan ni North Korean leader Kim Jong Un iti insidente kas maysa a “criminal act” gapo iti nakaro a panagbiddut kasaruno ti pannakadadael ti sumagmamano a paset ti sirok ti barko.
Nabigbig dagiti naarestar kas chief engineer iti shipyard, head ti The Hull Construction Workshop, ken ti deputy manager ti administrative affairs. Karaman pay a napaayaban ti shipyard manager a ni Hong Kil Ho para ti imbestigasyon.
Pinasingkedan daitoy ti militar manipud South Korea ken US intelligence a nagkuna a napaay iti “side-launch attempt” ti nasao a barko rason ti panaglubog na.
Iti sabali a bangir, impaganetget met ti KCNA a saan a nakaro ti perdisyon ken awan met ti abot ti barko kas maibasar ti naisayangat nga inspeksyon.
Indasig met ti South Korea ti baro a warship kas 5K tonelada a destroyer-class “Choe Hyon,” nga immuna nga imparang ti Pyongyang idi napalabas a bulan.
Suspetsa ita ti Seoul a posible a timmulong ti Russia ti konstruksyon iti barko kasukat ti panangipatulod da iti tropa idiay Ukraine.
