Maipagarup a saan pay a nakikoordinar ni sigud a Department of Public Works and Highways (DPWH) undersecretary Maria Catalina Cabral iti House Infrastructure Committee kasaruno ti umuna a panagdar-ay na kas resource person.
Maipalagip nga pinaayaban ti komite iti sigud nga opisial tapno pagpalawagen kadagiti sugmamano a saritaan kas iti alokasion ti pondo para kadagiti sumagmamano a proyekto, panangpabor kadagiti sumagmamano a contractor, ken kadagiti dadduma pay a kontrobersial nga isyu a bumalbalkot iti flood control.
Karaman kadagiti kontrobersial a waragawag ni Cabral ket iti maipagarup a panangitukon ti agingga P51 billion a pondo iti distrito nga iggem ni Davao City Rep. Paolo “Polong” Duterte a napasamak idi 2020 agingga 2022.
Segun kenni House InfraComm chair Terry Ridon, saan nan a nakasarita iti sigud nga opisial kalpasan iti umuna ken maudi a panagdar-ayna, iti laksid dagiti napapateg nga impormasion a mabalin na pay kuma nga ibutaktak.
Ti testimonia iti panangitukon ti P51 billion iti distrito nga iggem ti sigud a presidential son iti agserserbi a kadakkelan a rebelasion a nairuar iti panagtalantan ti InfraComm.
Inlawlawag met ni Ridon nga awan ti nagbalin a komunikasion ti komite iti kampo ni Cabral kalpasan daytoy, personal man wenno professional.
Maipagarup a saan met a personal a nakikoordinar kenkuana iti pimmusay nga undersecretary para iti posibilidad ti kanayunan nga impormasion.
Kasaruno ti pannakatay ni Cabral ket rumrumuar a nangibati isuna ti ado a files a naglaon dagiti proponents, pondo, lokasyon, ken dadduma pay a napapateg nga impormasion dagiti flood control project iti intero a pagilian.
Maysa kadagiti nakaala ditoy ket ni Batangas 1st District Rep. Leandro Leviste.
Kenuna pay ni Ridon, aramid ti komite a maaddaan ti personal a komunikasion kadagiti maim-imbitaran a resource person.#
