BR LA UNION – “Tokhang style” iti usaren nga estilo ti panagkampanya ni Senador Ronald Bato dela Rosa para iti umadanin a 2025 national and local elections.
Segun kenni dela Rosa, paset ti strategy na iti tokhang style campaign wenno house to house visit tapno maingato ti ranking na para senador.
Iti tokhang ket sarita a napartuat ken simmikat idi panawen ti drug war campaign ni sigud a Presidente Rodrigo Duterte.
Nabukel daytoy babaen ti nagtipon a Visayan term a “toktok” wenno katok ken “hangyo” wenno panagkiddaw .
Ni dela Rosa iti kangrunaan a nangipatungpal ti war on drugs idi administrasyon Duterte.
Idi masalodsod ti senador nu mangigubway kadi ti dibisyon ken pannakatikaw iti nasao nga estilo — sungbat ni Dela Rosa nga ammo na a saan nga ibotos isuna ti siasinuman a saan a mangayat ti tokhang.
Nangrugi idi Martes, Pebrero 11, iti 90-aldaw a campaign period dagiti kumandidato para-senador ken Party-list para iti 2025 Midterm Elections.
Adda kabukbukodan a gimik nga ar-aramiden dagiti kandidato tapno maala ti rikna ti tunggal botante tapno ibotos da iti kandidato.
Naituding intpn Mayo 12 iti 2025 national and local elections.
