LA UNION – Indatag ti National Bureau of Investigation (NBI) ti 16 a criminal complaints kontra kenni Yang Jianxin, iti kabsat ni sigud nga economic adviser Michael Yang.
Segun iti Inter-Agency Council Against Trafficking, sumangsango ni Yan Jianxin wenno Antonio Lim y Maestrado, Antonio M. Lim, Tony Lim, Tony Yang iti kaso a falsification, perjury ken panaglabsing iti Commonwealth Act 142 wenno Anti-Alias Law.
Naidatag ti reklamo idiay Office of the City Prosecutor ti Cagayan de Oro idi Oktubre 17, 2024.
Maipalagip nga idi Setyembre 19, 2024 inarestar ti Bureau of Immigration ni Yan Jianxin ken naidatag idiay senado ken House of Representatives para iti imbestigasyon ti human trafficking ken illegal Philippine Offshore Gaming Operators (POGO).
Innayon pay ti Inter-Agency Council Against Trafficking, a dagiti 16 a reklamo ket maipasidong iti preliminary investigation ken manamnama nga ad-adu pay a reklamo ti maidatag iti sumarsaruno nga aldaw.
