BR LA UNION – Naarestar iti Top 1 ken Top 2 Municipal Most Wanted Person idi Biyernes, Hulyo 11, 2025 idiay Brgy. Suguidan Sur, Naguilian, La Union.
Nabigbig dagitoy nga isuda Alyas “Tintoy”, agtawen ti 58, mannalon ken Alyas “Andy” agtawen ti 54, awanan asawa ken agpada a residente ti nasao a lugar.
Nakemmeg dagitoy babaen iti bileg ti warrant of arrest nga imapulog ni Hon. Criselda Manaat Lamiong-Bumacod, Presiding Judge ti Regional Trial Court Branch 11 idiay Bauang, La Union gapu iti kaso nga Acts of lasciviousness nga addaan pakainaigan iti RA No. 7610.
Inrekomenda ti lokal a korte iti PHP 200,000 ti kada kaso, a bail bond wenno piyansa para iti temporaryo a pannakawaya-waya dagiti suspek.
Nairecord ti nasao a police operation babaen ti Body Worn Camera.
Kabayatanna, dagiti suspek ket agpada a naiturong iti Rural Health Unit idiay Naguilan para iti medical examination kalpasanna, naiturong da idiay Naguilan Municipal Police Station para iti umno a dokumentasyon ken disposisyon.
