LA UNION – Posible iti transisyon ti weak La Niña ditoy pagilian inton Agosto agingga iti Oktubre.
Segun iti state weather bureau, narigat pay laeng a maammuan ita nu sadino wenno kaano iti eksakto a panagrugi ti La Niña.
Saan pay a mabalin nga ideklara iti panagrugi daytoy iti laksid ti mapas-pasaran itan a sagpaminsan a napigsa a panagtudo iti nalawa a paset ti pagilian.
Iti agdama, kinuna ti ahensiya nga adda pay laeng ti pagilian iti El Niño-Southern Oscillation neutral phase.
Kayatna a sawen a saan nga apektado ti Pilipinas iti El Niño wenno La Niña.
Nagballaag pay ti ahensiya a mabalin nga agtultuloy ti napigsa a panagtudo kadagiti sumaruno a bulan ken iti maudi a paset ti 2024 ket mabalin a mapasaran ti nangatngato a volume ti danum ti tudo.
