BR LA UNION – Posible nga iti sumaruno a tawen a marugyan ti trial proper kenni sigud a Presidente Rodrigo Duterte seknan iti sangsangwenna a kaso a crimes against humanity idiay International Criminal Court (ICC).
Segun kenni ICC-accredited lawyer Gilbert Andres, nupay adu iti interesado a mairugin ti panagusig kontra kenni Duterte, kinuna na a kasapolan a masurot ti due process para kenkuana.
Immuna ti daytoy, kinuna na a rumbeng a mapaneknekan nga umuna ti prosecution nga adda umdas a makagapo tapno rugyanen ti trial kontra iti sigud a presidente.
Nakatuding iti confirmation of charges hearing kontra kenni Duterte inton Setyembre 23 ket ditoy a manamnama nga ipresentar ti prosecution panel iti dua a testigo karaman ti dadduma pay nga ebidensiya a naurnong tapno adda substansiya iti kadawatan a rumbeng a mausig iti nakabalud a sigud nga opisyal.
Kalpasan ti September 23 hearing, maipaayan pay kunana ti dua a bulan (60 days) iti Pre-Trial Chamber tapno adalen dagiti mai-presintar nga ebidensiya agingga a mangirwar ti resolution nu maitultuloy ti panagusig wenno ma-absuwelto iti sigud a presidente.
Nu maituloy iti trial, mabalin kunana nga into bulan ti Enero ken Pebrero sumaruno a tawen wenno umuna a paset ti 2026 a marugyan ti trial.
