BR LA UNION – Awan ti anyaman nga agbalin nga epekto iti kadagaan ti Pilipinas iti bagyo wenno Tropical Storm Nari nga adda iti ruar ti Philippine Area of Responsibility (PAR), segun iti Pagasa.
Naudi a nasaripatpatan ti bagyo iti kaadayu a 2, 165 kilometro daya amianan-a-daya ti Extreme Northern Luzon.
Kabuyog ti angin a 65 kilometro kada oras ken kapegges a dumanon iti 80 kilometro kada oras.
Segun iti state weather bureau, agtur-turong ti bagyo iti daya amianan-a-padaya iti kapartak a 15 a kilometro, wenno dup-dupagenna iti direksiyon nga agpa-Japan.
Kabayatanna, agbalin a naannayas ti panawen idiay Metro Manila ken dadduma a paset ti pagilian a pakairamanan ditoy Amianan a Luzon ita nga aldaw, Hulyo 13.
Daytoy ket laksid ti panagraira ti southwest monsoon wenno habagat.
Kangrunaan nga apektaran ti habagat a makapadas ti sagpaminsan a napigsa a panagtudo ket idiay Palawan.
Kalalaingan nga epekto ti habagat ket mapasaran idiay Western Visayas, Negros Island Region, Zamboanga Peninsula, BARMM, Zambales, Bataan, Cavite, Batangas, ken nabatbati a paset ti MIMAROPA.
Nupay kasta, segun iti PAGASA, a makitkita ti posible a panag-pigsa iti epekto ti habagat inton Huwebes wenno Biyernes sumaruno a lawas.
