Dinepensaan manen ni U.S. President Donald Trump ni Israeli Prime Minister Benjamin Netanyahu ken inwagan kas “political witch hunt” dagiti maar-aramid a panagdengngeg kenkuana.
Segun kenni Trump, “terible” ken saan nga nainkalintegan para kenni Netanyahu – nga ibilbilang na kas “War Hero” ken lider nga addaan ti dakkel a kontribusyon ti relasyon ti Israel ken Estados Unidos, agraman metten ti panangtaming ti gyera idiay Iran.
Kinunana a ti panagdengngeg ket makaapektar ti negosasyon ni Netanyahu iti Hamas, nga adda pakainaigan na iti panangisubli kadagiti kautibo. Binabalaw na pay ti agtultuloy a panangimbestigar kenkuana laksid dagiti seryoso a problema, kas iti seguridad ti pagilian da.
Binabalaw ti Presidente dagiti pammabasol kenni Netanyahu, kas iti panag-awat na kadagiti nagkakangina nga alikamen manipud kadagiti negosyante kasukat ti pabor iti politika.
Kabayatanna, agtultuloy met nga ilablaban ni Netanyahu ti panagbalin na nga inosente ken nainget a pinaglibakan dagiti akusasyon maibusor kenkuana.
Nangrugi ti panagdengngeg iti Prime Minister idi tawen 2020 para kadagiti kaso a bribery, fraud, ken breach of trust.
