Nangipaulog ti nainget a pammakdaar ni U.S. President Donald Trump para ti Iran.
Kinunana nga apaman rauten da iti Estados Unidos ket marikna da ti intero a bileg ti American Military.
Ti maysa a post iti Truth Social, pinaglibakan ni Trump nga adda pakainaigan ti Estados Unidos kadagiti airstrikes ti Israel.
Kabayatanna, inaklon met ni Trump a timmulong ti Estados Unidos idiay Israel kadagiti missiles da ngem innayon na a saan da a timmulong a direkta para ti panagraut idiay Iran.
Impannakkel pay ni Trump a kabaelan ti US ken Israel a gibusen ti gyera nu kaykayaten da.
Ti sabali met a bangir ket impeksa ni Iranian Foreign Minister Abbas Araghchi nga addaan da kadagiti ebidensya a maipakita para ti panagsuporta ti Estados Unidos kadagiti panagpatayab ti missiles ti Israel.
Inwaragawag ni Trump ti maysa a pannakiuman na kenni Russian President Vladimir Putin a nasken nga agbinnulig dagiti pagilian tapno gibusenen ti gyera ti nagbaetan ti Israel ken Iran.
Nupay kasta, maipalagip met nga imbatad dagiti opisyales ti Russia ti agtultuloy da a panagsuporta iti negosasyon mainaig ti programa nuclear ti pagilian nga Iran.
Nangiwaragawag ti Germany karaman ti France ken Britain, ti kinasagana a makitaripnong iti Iran mainaig iti nuclear program da tapno maliklikan ti panagkaro ti sitwasyon idiay Middle East.
