Saan nga agdudua ni US President Donald Trump a mangipatulod kadagiti soldadot ti Estados Unidos idiay Ukraine tapno laeng maipatungpal ti peace deal ti nagbaetan da ti Russia.
Segun iti Presidente, daitoy iti dakamaten na kadagiti lider idiay Europa, pakairamanan ni United Kingdom Prime Minister Keir Starmer a kadwa na a makipaset ti panangpasigurado ti post-war peace idiay Ukraine.
Maipapan ti panangipaay ti security guarantees idiay Kyiv, imbatad ni Trump nga adu a tulong ti maipaay maipapan ti seguridad ti aniaman a post-war settlement ngem impaganetget na a ti Europa ti first line of defense, kabinnulig ti tulong manipud Estados Unidos.
Iti maysa a press briefing idiay ruar ti White House ket pinasingkedan ni Ukrainian President Volodomyr Zelensky nga indiaya ken asikasuen na ti detalye ti panaggatang ti aganay $90-B nga armas idiay Estados Unidos ti sangapulo nga aldaw, nupay nakatuding paylaeng a maipormal ti proposed deal kas paset ti security guarantees a nadakamat da ni Trump ken dagiti EU leaders.
Kabayatanna, kalapsan ti panagtaripnong ni Trump ken Zelensky kakadwa dagiti EU leaders ket sumaruno a panggep ni Trump iti peace summit ti nagbaetan da Zelensky ken Russian President Vladimir Putin, a mapasarunuan met ti trilateral meeting kadwa manen iti Estados Unidos.
