Inbinglay ti Department of Science and Technology (DOST) a posible pay a marekobre dagiti tulang dagiti mapukpukaw a mammallot nu naibelleng a talaga dagiti bangkay a idiay Taal Lake.
Maibasar daitoy ti rebelasyon ti whistleblower a ni Julie “Dondon” Patidongan alias “Totoy” a naibelleng iti bagi dagiti “missing sabungeros” iti nauneg a paset ti Taal Lake idiay Talisay, Batangas.
Inlawlawag ni DOST Secretary Renato Solidum a dagiti inuneg ti bagi ti tao ket nalaka a ma-decompose ngem dagiti tulang ket mabalin a ma-preserba, depende ti kauneg ken oxygen content ti danum.
Sakbayna ket inwaragawag dagiti otoridad iti panagayat ti pagilian a Japan a tumulong iti panagbirok kadagiti bangkay, usar dagiti teknikal ken kabaroan a teknolohiya.
Kabayatanna, imbes a mangipatulod kadagiti divers ket insingasing ni Solidum iti panangaramat iti camera agsipud ta saan a natalged iti panaglangoy iti uneg ti danum ti Taal.
Kasaruno ti imbestigasyon, dinakamat ni Patidongan ti nagan dagiti dadduma a nalalatak a personalidad a karaman iti kaso kabayatan dagiti agwarwaras a kontra-akusasyon nga extortion kontra ti nasao a whistleblower.
