LA UNION – Nakasagana a tumulong para iti naulila a pamilya ti poultry farm owner iti gastusen ti funeral services kadagiti dua nga ubbing a nakuryente kabayatan nga agpalpaliwliw ti tukak idiay Barangay Naboongan, ili ti Sto. Tomas, La Union.
Iti pannakiuman ti Bombo Radyo kenni S/Ins. Cresencio Avila Jr., hepe ti Sto. Tomas Police, kinunana nga impalubosda nga agsarita ken agtulag dagiti nagannak dagiti ubbing ken ti farm owner a ni Adonis Robles.
Kabayatanna, inaklon met ti farm owner a nairanta ti ti naikabil nga electric fence iti pagtarakenanna ti manok tapno masalakniban daytoy kontra iti agtatakaw.
Binagaan met ti pulisya ni Robles ti inkabilna a kuryente iti nasao nga alad.
Immuna iti daytoy, natay dagiti ubbing nga agkabsat kabayatan nga agpalpaliwliwda iti tukak kalpasan a masagidda ti ‘live wire’ a naiyalad iti nasao a poultry farm kahapon.
