Winaswas ti maysa a korte idiay London iti linteg idiay Trinidad and Tobago a nagkriminalisa iti consensual sexual relations dagiti agpada a lallaki, kalpasan a mabigbig iti panaglabsing daitoy kadagiti kangrunaan a karbengan pantao.
Iti desision a nairuar idi Martes, Nobyembre 10, pinaboran ti Privy Council ti apela para iti Trinidad and Tobago, iti petisyon ni Jason Jones, maysa a ‘gay man’ a nagkwestiyon iti konstitusyonalidad ti Sexual Offenses Act ti nasao a pagilian.
Iti sidong ti nasao a linteg, maiparparit dagiti aramid a maawawagan a “buggery” ken “gross indecency,” a maususar tapnu i-criminalize dagiti sumagmamano a klase ti sex ken intimate acts iti nagbaetan dagiti agpada a lalaki.
Naipasngay idiay Trinidad and Tobago ken agdama nga agnanaed idiay Britain ni Jones, a mangkunkuna a labsingen ti linteg dagiti kangrunaan a karbengan na iti sidong ti konstitusyon ti pagilian.
Naragsak na met nga inawat iti desisyon ti korte, nupay impaganetget na nga ad-adda a nalawlawa iti saritaan ti karbengan pantao ken pannakapantay-pantay para iti LGBTQ+ community, aglalo kadagiti pagilian nga agtultuloy a mangususar dagiti linteg a naggapu pay idi panawen ti kolonyalismo ti Britain.
Segun kenni Judge Philip Sales, sakup iti karbengan ti pribado ken pampamilya a biga iti maysa a napateg a paset ti pakabigbigan ti tao, karaman iti sexual orientation, isu a saan a mabalin nga irason dagiti linteg a mangkriminalisa kadagitoy a pribado a koneksion.
Immunan a pimmabor kenni Jones iti High Court ti Trinidad and Tobago idi 2018, ngem binaligtad iti desisyon isu nga impangato na iti kaso ti Privy Council.
Iti nasao a ruling ket maysa manen a napateg nga addang iti panangitandudo ti karbengan ti LGBTQ+ community idiay Caribbean, nu sadinno adda latta dagiti sumagmamano a pagilian a mangipatpatungpal dagiti linteg a mangiparparit iti same-sex intimacy.
Kabayatanna, saan pay a nangibinglay ti waragawag iti opisina ti Attorney General ti Trinidad and Tobago, a nagkedked iti apela ni Jones.
