Nagbalin a ‘generally peaceful’ ti panaglukat ken umuna nga aldaw ti klase ti intero a Pilipinas.
Segun kenni Philippine National Police (PNP) Chief General Nicolas Torre III, awan ti naipadamag kenkuada nga aniaman nga untoward incident kasaruno ti panagsubli ti klase dagiti estudyante.
Kinuna ni Torre a sumagmamano a bulan sakbay ti panagseserrek ket nakikoordinaren ti kapulisan kadagiti school heads tapno masiguro ti kinatalged dagiti ubbing ken mannursuro.
Kabayatanna, impaganetget na met kadagiti nagannak a kabinnulig da ti PNP iti panagbantay kadagiti annak da iti kaadda da kadagiti pagadalan ken ti dalan da paawid kadagiti pagtaengan da.
Sakbayna ket nangiwaras iti PNP ti pakabuklan a 37,740 police personnel malaksid pay dagiti naipasdek a Police Assistance Desks, mobile patrols, ken foot patrols tapno masiguro ti kinatalged dagiti amin a maseknan ita a nangrugin ti klase.
