BR LA UNION – Inyanunsiyo ti Metropolitan Manila Development Authority (MMDA) ken Department of Public Works and Highways (DPWH) iti plano a panangipatakder ti underground water detention tanks iti naduma-duma a paset idiay Metro Manila kas paset ti addang tapno maikkan ti solusyon iti nakaru a panaglayos iti rehiyon.
Segun iti MMDA, dagiti nasao a tangke ket agserbi a pagurnongan ti danum ti tudo, a mabalin nga usaren manen iti sabali a banag, kas koma, panglinis iti kalsada wenno pagsibog ti mula.
Nairanta daytoy tapno makissayan iti kellaat a panaglayos iti kalsada tunggal makapadas ti napigsa a panagtudo .
Maipangruna ita a tawen iti water detention tank iti uneg ti Camp Aguinaldo idiay Quezon City.
Kabilang pay dagiti lugar a pagipatakderan ti kapada a pasilidad ket idiay Liwasang Bonifacio, Rajah Sulayman Park, Remedios Circle, ken University of Santo Tomas (UST).
Paset daytoy iti nalawlawa a flood control program ti MMDA ken DPWH para idiay Metro Manila.
Kabayatanna, pinapigsa ti MMDA iti kampanya kontra layos idiay Metro Manila babaen ti naggi-giddan a panagdalus iti estero ken panagiproseso ti basura kas sungbat iti epekto ti climate change.
Segun kenni MMDA Chairman Romando Artes, dackel ti papel ti solid waste management iti flood control.
Kinuna na, dagiti barado nga estero ket bunga ti kinakurang ti disiplina iti panagibelleng ti basura.
Mainaig ti daytoy, nangrugin iti rehabilitasyon kadagiti 23 a kangrunaan nga estero babaen iti baro a desilting equipment ti MMDA.
Tarigagay ti ahensya a regular a mapagtalinaed na a nadalus bayat a mamon-monitor iti nabatbati a 250 a pagayusan ti danum idiay NCR.
