Saan nga maaklon iti pamilya Pera iti Barangay Napaset, Balaoan, La Union ti napasamak ti padre de pamilya a ni Eliseo Pera kalpasan a paltugan iti maipagarup a riding in tandem suspects agarup alas-12:45 idi malem kalman idiay Barangay Cantoria No. 2, Luna, La Union.
Segun iti kapamilya ti biktima, pasado ala una idi malem kalman idi naamuanda ti insidente kalpasan nga impakaammo daytoy ti maysa a kabagyanda kasaruno ti dagus dagitoy a panagturong iti crime scene.
Kinumpirma da nga agawiden ti biktima manipud ili ti Balaoan ken Luna kalpasan iti panagsingirna idi a napasamak ti insidente.
Inladawanda ti napapatay a biktima a naangaw ken nasingpet no sadino awan ti ammoda a nakarinnikyarna ken awan ti pangta iti biag daytoy.
Segun iti pamilya ti biktima, dakkel a pukawda iti pannakatay daytoy agsipudta adu pay ti plano na para kadakuada.
Naamuan a nabayagen nga agtaltalon, negosyante ken money lender kasta pay a mangidadaulo kadagiti nadumaduma nga organisasyon dagiti mannalon ti biktima.
Madama pay laeng iti pannakaiproseso ti bangkay iti biktima iti punerarya ken maururay iti resulta ti authopsy daytoy.
Kabayatanna, gumawgawawa ti hustisya iti naulila a pamilya ti biktima para iti dagus a pannakakimmeg kadagiti suspek ken iti motiboda iti krimen.
