BR LA UNION – Nauram ti balay iti pamilya Cabagbag idiay Barangay Baroro, Bacnotan, La Union gapu iti pimmutok a solar breaker.
Napasamak ti insidente idi malem ti Domingo, Agosto 17, 2025 bayat nga awan dagiti bumalay.
Maibasar iti salaysay dagiti biktima, kasangsangpet da manipud Manaoag, Pangasinan idi apag-isu a timpuar ti uram.
Naka-angot nga immuna iti nabaniit ti maysa a miyembro sakbay a timpuar ti dackel nga apoy ken naaddaan iti babassit a panag-putok iti uneg ti balay.
Pattien da a pimmutok ti solar breaker nga adda laeng iti likod a paset ti main door.
Naamwan a solar power iti us-usaren nga elektrisidad ti pamilya Cabagbag.
Sakbay ti insidente, imbaga ti pamilya nga on-and-off ti silaw da, banag a posible nga adda problema iti linya ti solar panel.
Naamwan pay nga installer ti solar panel iti mister ti pamilya Cabagbag.
Maipalagip a nagturong idiay Manaoag, Pangasinan ti pamilya Cabagbag idi parbangon ti Domingo tapno pa-bendisyunan iti lapis nga usaren ni Ronald Khevin para iti September 2025 Licensure Examination for Teachers.
Karaman a nauram ken dimmapo iti laptop na, reviewers, ken dagiti kangrunaan nga alikamen wenno appliances ti pamilya.
Sakbay a simmangpet dagiti kameng ti Bureau of Fire Protection wenno BFP-Bacnotan, uppat agingga lima a fire extinguisher manipud kadagiti stores dagiti kaarruba ti nausar a pinangsebseb ti apoy.
Agtultuloy iti inbestigasyon dagiti otoridad tapno amwen ti pudno a nagtaudan ti uram ken pakabuklan a danyos.
//////
