LA UNION – Malaksid iti isyu ti politika ket karaman kadagiti imbestigaranti nabukel nga special investigation task group ti maipagarup a pannakairaman ni sigud a Congressman Eufranio “Franny” Eriguel iti narco-list maipapan ti insidente ti pammaltog a nakatayanna a napasamak idiay Barangay Capas, ili ti Agoo, La Union idi rabii ti Sabado.
Iti pannakiuman ti Bombo Radyo kenni Supt. Marlon Paiste, Information Office ti Police Regional Office-1, kinunana nga imbilin ti Regional Director-da a ni C/Supt. Romulo Sapitula a siripen iti amin a posible nga anggulo iti panangpapatay ti sigud a mammanday-linteg.
Sigun kenni Paiste, maysa ti saritaan ti politika ti imbestigaranda gapu ta sigud a nabutusan nga opisyal ti gobyerno ti dati a kongresman, kabayatan nga agdama met nga agpapaay kas Congresswoman ti asawana a ni Dra. Sandra Eriguel iti maikaddua a distrito ti probinsya.
Saanda met nga ipapaigid ti imbestigasyon maipapan iti pannakairaman ti nagan ti sigud a kongresman iti listaan dagiti politiko a kabilang iti narco-list nga iggem ken dinakamat idi ni Pangulo Rodrigo Duterte.
Kabayatanna, dua met iti tinukoy ti pulisya a persons of interest a mabalin a makaited ti pannakailawlawag ti insidente.
