LA UNION – Baklayen ti respondent driver ti gastos iti pannakaitabon ti maysa a mannalon a nadungpar ti airconditioned bus a minamaneho ti immuna iti igid ti national highway idiay Barangay San Blas, Bangar, La Union.
Iti pannakiuman ti Bombo Radyo kenni PO3 Pablo Gaudia, imbestigador ti Bangar Police Station, daytoy iti napagtulagan ti pamilya ti natay a biktima a ni Eduardo Ulpindo, 47, adda asawa, residente ti Barangay Agdeppa ken ti bus driver a ni Ferdinand Marcos Ramos, 44, adda asawa, ti Banna, Ilocos Norte.
Segun kenni PO3 Gaudia, nagpaaramiden ti surat iti pamilya ti biktima iti abogado no sadino a nakalanad a nakasagana a sungbatan ti respondent driver iti nagbalin a danyos daytoy.
Maipalagip, naideklara a dead-on-arrival iti Balaoan District Hospital ti biktima a nadungpar ti bus kabayatan a magmagna iti igid ti kalsada iti nasao nga ili.
Iti agdama ket nakabalod pay ti respondent kabayatan a maaur-uray iti impaaramid a surat ti pimilya iti pimmusay a biktima.
